Compartimos a seguinte actividade do SNL do Concello de Pontevedra que pode ser do voso interese.
A praza
da Pedreira acollerá o sábado 12 de outubro ás 17 h a final
da cuarta edición da Liga CeibaRimas, unha competición anual de rap
improvisado en galego que ten entre os seus obxectivos a normalización
e dinamización da lingua entre a mocidade a través dos espazos de
improvisación oral, isto é, do freestyle ou rap improvisado. O
proxecto CeibaRimas foi merecedor dun dos Premios Mil Primaveras no ano 2023.
A
participación na liga é de balde e está aberta a todas as
persoas maiores de 12 anos que teñan dispoñibilidade para
participar no evento do día 12 de outubro (de 17 h a 23 h). As persoas menores
de idade deberán achegarlle á organización unha autorización dun
dos proxenitores ou titores legais.
O formulario de inscrición estará aberto ata 24
horas antes de que comece o evento. Mais é posible tamén inscribirse in
situ, antes do comezo do evento. Hai catro premios por un total de 800
euros, trofeos e lotes de produtos. Deixámosvos a ligazón ás bases completas.
Ademais da
competición en si mesma, o evento contará nos entretempos coas actuacións
de Flow do Toxo e Kid Mount, e con demostracións de novos talentos neste
eido.
Trátase da
única competición de freestyle en galego, e convértese nun evento
imprescindible para todas as persoas que queiran vivir unha experiencia única
de cultura urbana galega.
Podedes
consultar toda a información no web de CeibaRimas.
Animádevos a participar!
Ningún comentario:
Publicar un comentario